Pawl 5-in thisen unit 183 an pe

March 4, Inrinni khan Mizo-ramah thisen unit 183 pek a ni. Tuipuiral Zirlai Pawl chuan an din cham vawi 37-na pualin Hrangbana College-ah thisen pek an huaihawt a, Civil Hospital, Aizawl tan thisen unit 44 an pe a, petute mipa 42 leh hmeichhia pahnih an ni. Civil Hospital tan vêk khan ṬKP, Aizawl Central Bial-in thisen unit 46 an pe a, petute mipa 35 leh hmeichhia 11 an ni.

Inrinni vêk khan KṬP, Maubawk Pastor Bial chuan Synod Hospital tan thisen unit 37 an pe a, petute mipa 31 leh hmeichhia paruk an ni a; Aibawk Bial PYD member mipa 19 leh hmeichhia pathumte'n ZMC tan unit 22 an pe. ṬKP, Hnahthial Bazar Pastor Bial-in Hnahthial Venglai BCM kohhran hall-ah Christian Hospital tan thisen unit 34 an pe a, petute mipa 27 leh hmeichhia pasarih an ni.