Lunglei by-pass road sum pawh pên vangin lungawi lohna lantir a ni dawn
Chhimbial Chhantu chuan Lunglei by-pass road siamna tura sum dahte thil dang atan hman ṭhen a nih avangin March 7, Thawhlehni hian lungawi lohna an lantir dawn.
Chhimbial Chhantu hruaitute chu March 3, 2023 khan an ṭhukhawm a; Legislative Assembly budget session neih zawh tâkah PWD enkawltu chief minister Zoramthanga'n Lunglei by-pass road siamna tur sum dah cheng nuai 1,000 zinga nuai 500 chuang chu Lunglei khaw chhung kawngpui thawm ṭhatna atan hman a nih thu a sawi chungchang an ngaihtuah a ni.
Thu dawn danin, Congress party-in sorkarna an chan lai khan NEDP hnuaiah Lunglei by-pass road siamna atan cheng nuai 1,000 dah a ni a, tun thlengin by-pass road chu siam a la ni lo. By-pass road siamna tura sum dah nuai 1,000 zinga nuai 500 chuang chu Lunglei khawpui chhung kawngpui thawm ṭhatna atan hman a nih thu Chief Minister-in a sawi chu hriatthiam har an tih thu leh sorkarin chhim lam a ngaihthahzia lannaa an ngaih thu an tarlang.
Chhimbial Chhantu chuan, "Lunglei khawpui chhung kawng siamna senso atan pawisa dah awm miah lo a, Lunglei leh chhim lam mipuiin a mamawh em em by-pass road siamna tura pawisa dah tawh sorkarin a hmang ta mai hi chhim lam min ngaihthahzia tihlannaah kan ngai," an ti a; sorkar thil tih danah lungawi lohna lantir an rel a ni.
Thu dawn danin, Chhimbial Chhantu hian lungawi lohna lantirna atan naktuk Thawhlehni hian Lunglei High Powered Committee pisa bulah punkhawm an huaihawt dawn a, chawhma dar 11-ah ṭan an tum a ni.
Chhimbial Chhantu chuan, Mizoram chhim lam tan commissioner puitling dah a nih theih nana hmalak an rel bawk a; Lunglei Municipal Council a taka a hlawhtling tur chu lawmawm an tih thu te, LMC inthlan turah mi dik, rinawm leh hmingṭhate candidate turin political party tin an ngen thute an tarlang bawk.