KHAWTHLIR

PYD Day hmang
Mizoram UPC kohhran ṭhalai pawl, Pentecostal Youth Department (PYD) chuan March 4, Inrinni khan an din champha (PYD Day) vawi 62-na an hmang. Mizoram UPC kohhran ṭhalaite chuan PYD Day hi vantlang tana thil ṭha tih nan leh ṭanpui ngai ṭanpuina atan an hmang hlawm a, Day thuchah an chhiar chhuak bawk.

Nuai 573.69 hmang
Lunglei khawpuiah kawngpui thawm ṭhatna atan kum 2019 aṭangin cheng nuai 573.69 hman a ni tawh tih PWD enkawltu chief minister Zoramthanga chuan a tarlang a; hei hi Assembly budget session neih zawh tâkah khan ZPM member Vanlalhlana zawhna ziakin a chháng a ni.

Thiin hmu
December 17, 2020 aṭanga bo Freddy Lalengchhuaka (27) s/o C Lalventhuama, Champhai Electric Veng ruhro chu nimin khan Khawzim ram, Tiau lui kamah hmuh a ni a, nimin tlai khan vui nghal a ni. Freddy-a hi Mizo dana ni sarih zawn a nih hnuah a thlahna hun hman a lo ni tawh a ni.

Chapchar rimawi
Mizo Zaimi Inzawmkhawm chuan March 4, Inrinni zan khan Lammualah Chapchar Rimawi Kût an buatsaih a, Art and Culture minister R Lalzirliana'n a hmanpui. Zaithiam leh band eng emaw zatin hun an hmang a, Art huanga Padma Shri dawngtu KC Runremsangi hnenah chawimawina hlan a ni. R Lalzirliana chuan, Mizo nun mawi chawisan a ṭulzia ṭhangtharte'n an hriat thar a pawimawh thu leh huaisen taka dikna ṭan ngam a ṭul thu a sawi.

NEIGHRIMS tlawh
Human Resource Development Board vice chairman Dr L Thangmawia, MLA chuan March 3, 2023 khan Shillong-a NEIGRIHMS a tlawh. MLA chuan, NEIGHRIMS-a Mizo doctor, nurse leh doctor zir mekte'n Mizo tlawmngaihna vanga an hna baka damlote an lo buaipui ṭhinnaah lawmthu a sawi a; an thawhrimna leh inpekna avangin damlo, NEIGRIHMS pantute an lawm ṭhinzia a hrilh bawk.