District 4-ah kuhva kudam 74 a awm

Mizoram police-te chuan kum 2019 aṭanga February 10, 2023 thleng khan Myanmar aṭanga dan loa kuhva rah lâk luh leh tawlhruk nia rinhlelh ip 17,456 an man tawh a; district 11 zinga district pali-ah kuhva rah dahna kudam 74 a awm.

Legislative Assembly budget session neih zawh tâkah February 28, 2023 khan Home minister Lalchamliana'n ZPM member Dr Vanlalthlana zawhna ziaka a chhàn danin, kum 2019 aṭanga khan Mizoram police-te'n a malin emaw, thawhpui neiin emaw kuhva rah tawlhrûk nia rinhlelh ip 17,456 an man tawh a; an man tam ber kum, 2021 khan ip 6,241 an man a ni.

Task Group on Illegal Arecanut bul tumin district 11 zinga pali - Aizawl, Champhai, Kolasib leh Mamit district-ah kuhva rah tawlhruk nia hriat dahna kudam 74 a awm tih hmuh chhuah a ni a; kudam 74 zinga 43 chu Kolasib district-a mi niin a tam ber a, Champhai district-ah kudam 25, Mamit district-ah panga leh Aizawl district-ah pakhat a awm a ni.