Sorkar ṭha siam hi kan party thil tum a ni - MPCC Spokesperson

MPCC thupuangtu Dr Lallianchhunga chuan, Congress party thil tum chu sorkar ṭha siam a nih thu a sawi.

MPCC Campaign Committee ruahmanna anga March 3-4, 2023 chhunga Rengdil, Zamuang, Sihṭhiang, Saikhawthlir leh Chuhvel khuate an tlawhnaah Dr Lallianchhunga chuan, "Ṭang puihna hmangin kut hnathawktute kut kan tichak dawn," a ti.

Congress party chu miretheite tana ding ṭhin nia sawiin Lallianchhunga chuan, "Congress sorkar hnuaiah miretheite dinchhuahna tur leh mirethei zawkte'n an chanvo an dawn theihna tura sorkar ṭha siam hi Congress party thil tum a ni," a ti a, an party chu mipui hnena an intiamna tihlawhtling ṭhin a nih thu a sawi.

MPCC spokeperson chuan, MNF sorkar hmasaah Mizoram sum leh pai dinhmun a chhe em em tih sawiin, "Chumi siamṭha tur chuan Congress party kan sorkar a, Mizoram leiba tam tak rulh nghal a ni. Tunah pawh MNF-te'n kum 4 chauh sorkarna an chelh chungin kan leiba chu vbc. 6,000 chuangin a pung leh tawh. Mizoram sum leh pai dinhmunin a sen a kâwk a, ICU-ah enkawl ngaiin kan awm leh ta a ni," a ti.

Sum leh paia Mizoram harsatna sukiang turin Pathianin sum enkawl thiam, enchhin chawp ngai lo Lalsawta a pe nia sawiin Lallianchhunga chuan, "Mizoram hruai chhuak tura Pathianin min pek a ni," a ti a; an party-in hruaitu atan Lalsawta an nei chu an party tan chauh ni lo, Mizoram tana vanneihna a nih thu a sawi bawk.