Zamuangah kuhva rah ip 379 man a ni

March 3, 2023 zing khan Hachhek Bial Kuhva Chingtu Pawl (HBKCP) leh Mizoram police-te chuan Zamuang, Mamit district-ah dan loa lak luh kuhva rah ip 379 an man.

Mizoram police tarlan danin, HBKCP hruaitute chuan Zamuangah kuhva ro phur truck pathum an man a, Zawlnuam police-te an hriattir nghal. Kuhva phur truck pakhat chu a tlân tlang hman a, police-te'n ûmin an man leh a ni.

Truck pathuma kuhva phurhte chu ip 379 a ni a, kg. 30,320 vel a ni. Kuhva rah man chungchangah hian Kanhmun Police Station-ah thubuai ziah luh a ni.

Kuhva phurtute chuan, kuhva chu Aizawl By-pass Road aṭangin truck dang aṭanga an phurh chhâwn a nih thu an sawi hlawm a, pakhat chuan Lengpui khuaa in pakhat aṭanga a phurh chhâwn niin a sawi thung. Kuhvate chu Kanhmuna dah turin a neitute'n an hrilh niin an sawi hlawm bawk.

Champhai police-te pawhin March 4, Inrinni khan Zotlang leh Chhungte inkarah Lalawmpuia (27), Champhai Kahrawt nia inchhâl khalh truck-ah Myanmar aṭanga lâk luh kuhva rah ip 100 (kg. 6,000 vel) an man bawk.