March 2022 thleng tar pension pe tawh

Legislative Assembly budget session neih zawh tâkah Social Welfare & Tribal Affairs minister Lalrinawma chuan ZPM member Lalduhoma zawhna ziaka chhàngin, Mizoram sorkarin March 2022 thleng tar pension a pe tawh a, kum 2022-23 atana pek tur a buatsaih mek.

Mizoram sorkar hian sorkar laipui aṭangin tar pension atan kum 2021-22 chhungin September 15, 2021 leh March 31, 2022 khan cheng nuai 235.77 ve ve a dawng a, a vaiin nuai 471.54 a tling. Hemi kum vêk hian Mizoram sorkarin a tum ve tur chu kum 2022 March 8 & 25-ah cheng nuai 151.28 ve ve, a vaiin nuai 302.56 a pe bawk.

Kum 2022-23 atan sorkar laipui chuan February 14, 2023 khan Mizoram sorkar hnenah tar pension tur cheng nuai 929.77 a pe a, Mizoram sorkarin a tum ve tur pek a la ni lo a, buatsaih mek a nih thu tarlan a ni.

SWTA department chuan, tar pension atana sorkar laipui aṭanga sum hmuh chu September 2021 thleng pek a nih tawh thu leh Mizoram sorkar tum tur pawh March 2022 thleng pek a nih thu a tarlang a, "Central share pek tur hmabak hi Ministry aṭangin October 2022 thleng atan February 14, 2023 khan a release a. Pek a nih thuai theih nan hmalak mek a ni. State contribution (2022-23) hi sem chhuah turin department-in a buatsaih mek," a ti bawk.