SEDP-a ṭanpuina hmahruai atan Horticulture hnuaiah ṭanpuina sem
Horticulture Development Board vice chairman Prof. F Lalnunmawia, MLA chuan Socio-Economic Development Programme (SEDP) hnuaia sum sem hmahruai atan nimin khan dragon fruit chingtute hnenah ṭanpuina sum a sem.
SEDP hnuaia ṭanpuina sum sem hi Horticulture directorate conference hall-ah neih a ni a, inkhawm hi Horticulture director Dr Elizabeth Saipari'n a kaihruai. Dragon fruit chíngtu mi 95 hnenah ṭanpuina sum hmahruai Rs. 30,000 ṭheuha pek a ni.
Prof. F Lalnunmawia chuan, sorkar flagship programme SEDP hnuaiah dragon fruit chíng tura thlan hmasakte hnenah sum sem theih a ni ta chu lawmawm a tih thu a sawi a, "Kan CM Pu Zoramthanga kaihhruai sorkar hian inthlan laia a thutiam kha a theihnghilh lo a, SEDP pawh tihhlawhtlin ngei a tum. Covid-19 vanga harsatna nasa tak kan tâwk chungin SEDP hi a theih ang angin, a tahtawla tihhlawhtlin kan tum," a ti.
Horticulture hnuaiah SEDP hmahruai atan dragon fruit chíng turin mi 95 thlan a nih thu sawiin F Lalnunmawia chuan, "Hri léng leh sum leh pai harsatna karah tihfel tur neuh neuh a awm avangin thil tih zung zung a harsa a, chutih rualin, a chìn hun a tlai mai dawn tawh avangin kan inpeih veleh hetiang programme hi kan siam a ni," a ti a; dragon fruit chíngtu turte'n eizawnna nghet an neih phah a beisei thu a sawi.
Prof. F Lalnunmawia chuan SEDP chungchang sawiin, "Hei hi a bul ṭanna a ni a, sorkar chuan a theih dan danin trade hrang hrangah SEDP kalpui zel a tum. Ṭum khatah zau takin a cover nghal vek loh pawhin, a tahtawla district leh MLA bial hrang hrangah kalpui zel kan beisei a ni," a ti.
Horticulture Director sawi danin, a tirah chuan SEDP-ah dragon fruit a tel lo a, inkharkhip laiin thlai leh ei tur mamawhna a nasat avangin telh turin Chief Minister hnenah an ngen a, Chief Minister chuan a phalsak a ni.
Dragon fruit chungchang sawifiahtu Vanlalnuntluanga Renthlei sawi danin, dragon fruit hi Mizoramah kum sarih vel kal ta aṭangin an buaipui a, Vietnam, Thailand leh Myanmar aṭanga lâk luh a ni.