Surgeon-te'n khawmpui an hmang

Association of Surgeons of Mizoram chuan March 4, Inrinni khan Aijal Club-ah Annual Conference vawi 3-na an hmang a, Health & Family Welfare minister Dr R Lalthangliana'n a hmanpui.

Health Minister chuan medical lamah Mizoramin hma a sawn zia sawiin, "Tunhnaiah JICA puihnain Cancer Super Speciality Hospital sak ṭan a ni dawn. Primary health care pawh kan ngai pawimawh a, sub center-te tihchangtlun (upgrade) chhoh zel a ni. Health clinic pawh Mizorama thingtlang khaw hrang hrang ah 200 chuang health worker-te enkawlna hnuaiah din a ni," a ti.

Dr R Lalthangliana chuan tun hnaia Mizo doctor super specialist an awm ta nual chu lawmawm a tih thu a sawi a, kalkhawmte zinga mi tunhnaia cancer surgery superspecialist zo thar Lalchhandami Colney chu a lawmpui thu sawiin, doctor kalkhawmte chu zirna leh thiamna sang zawk hmu turin a fuih.

ASM Annual Conference-ah hian Dr R Tlangkunga hriatrengna pual (oration) buatsaih a ni a, Mizorama oration hman hmasak ber a ni.

ASM hi kum 2018-ah din a ni a, member 41 an awm mek a, member zingah hmeichhia pali an awm.