CM biala kawng siam a chhia - ZPM Ṭhalai

ZPM ṭhalaite chuan Chief Minister bial Sihphir Venghluna kawngpui siamte a hmunah kalin an enfiah a, "Nausel road leh Vasih road-a kawng siamte'n belhchian a dâwl lo hle a, kum tam pawh a vei hmain kawng siamte hi hmun tam zawkah chuan a khawk leh vek tawh," an ti.

ZPM Ṭhalai thuchhuah chuan, CM bialah kawng siamna atan sum tam tak a kal tih tarlangin, "A takah erawh kawng siamte a chhe em em mai hi pawi kan ti," a ti a, mipui zah lohna lian taka an ngaih thu an tarlang.

Kawng an endik ṭhenkhat chu hripui lên lai, ei leh in tur nei loa mi náwlpui an awm laia MNF sorkarin induhsakna uchuak tak hmanga an thawh nia tarlangin ZPM ṭhalaite chuan, "Kum tam pawh a vei hma leh an term takngial pawh a tàwp hmaa an kawngpui siamte a khawk leh vek hman leh iron rod phûmte pawh a lang leh fer fur ta hian MNF sorkar nihna dik tak a pholang chiang hle," an ti.

ZPM Ṭhalai tarlan danin, Sihphir Venghlun Vasih road-ah hian kawng siamna tur cement chu cement chawhna khawl hmang loin JCB hmanga chawh a ni a, lei laih khuarah JCB hmangin cement chu hâi/chawh a ni.

MNF sorkarna hnuaiah Chief Minister bialah hna belhchian dâwl lo hmuh tur a awm chu pawi an tih thu tarlangin ZPM Ṭhalai chuan, "Mipuite'n an chan tur dik tak an chan a, hmasawnna hna rotling thawhna kawngah dik taka hna thawh a nih a, sum leh paite mipuite hlâwkna tura hman a nih theihna turin chak takin hma kan la zel dawn a ni," an ti.