Mau tawlhruk tur man a ni

Kolasib DFO Margareth Lalramchhani leh a hote chuan March 4, Inrinni khan Mizoram aṭanga state pawna mau tawlh chhuah tur eng emaw zat an man.

Kolasib DFO leh a hote hian mau tawlhru an awm tih an hriat veleh an umzui nghal a, Chhimluang lui leh Tuichhuahen lui inkar Sesih lui bulah an nangching a ni.

Maute hi Kolasib Ṭumpui Venga mimal huan a mi, hnamdang hnena hralh a ni. A huan awmna hi Inner Line Reserved Forest (ILRF) chhung a ni.

Mau hi a vaiin tel 39 a ni a, tel khatah pum 60 zel awmin, a vaiin pum 2,340 a ni. Hnamdang hian a vai hian Rs 40,000 in a lei.

Forest department chuan hetianga (ILRF) chhunga mau tawlh tur an mante chu royalty an chawi tir ṭhin a, pum khatah Rs 2 zel an chawitir ṭhin a ni.

Hetihlai hian, ILRF huam chhung a mi ni lo mauah chuan Forest department-in thuneihna an nei chiah lo. Mau hi Horticulture department hnuaia awm a ni tawh.