Dy CM-in Khawzawl SWMC a tlawh

Deputy chief minister Tawnluia, UDPA department enkawltu chuan March 4, Inrinni khan Khawzawl Darngawn ram, Pengpui tlanga bawlhhlawh sakhat sawngbawlna tur Solid Waste Management Centre (SWMC) sak mek a tlawh. SWMC hi Special Central Assistance 2020-21 sum nuai 60 hmanga siam a ni.

Tawnluia chuan, Khawzawl SWMC dinna tura hmunhma hrang hrang thawh zawh tawhte bakah, puitlin a nih theihna turin ruahmanna siam a nih thu a sawi a, "Financial year tharah UDPA department kaltlanga hmalak chhunzawm tum a ni. Khawpui a ṭhang ang zelin kan khawsaknain a ken tel bawlhhlawh a pung a, bawlhhlawhte hi mumal tak leh awmze neia sawngbawl a pawimawh tawlh tawlh dawn," a ti.

Khawzawl SWMC-ah hian cement concrete-in metre 400-a thui leh metre 3.5-a zau a panna kawng siam a ni a, SWMC chhunga inkalpawhna kawng metre 200-a thui siam a ni tawh. Main gate, bawlhhlawh ṭawih thei leh ṭawih thei lo thliar hranna segregation platform (metre 45X38), site office, litre 27,000 dawng RCC tuizêm leh a hungna metre 150-a thui siam a ni

tawh bawk.

Tawnluia hian March 4 vêk khan Khualen khua a tlawh bawk a, BNRGSK Hall-ah vantlang inkhawm hmanpuiin, khawtlang mamawh leh pawimawhte sawiho a ni.