Mizoram sorkar a vuaichà - MPYCC
Mizoram Pradesh Youth Congress Committee (MPYCC) chuan thuchhuah siamin, district tina swab sample endikna kháwl leina tura thla khat liam ta, July 2, 2020-a pawisa pek chhuah (sanction) vek tawh, tun thlenga chanchin hriat zui a la ni lo chu mak an tih thu leh, Mizoram sorkar chu a vuaichà hlea an ngaih thu an tarlang.
Congress ṭhalaite chuan, "Mizoram sorkar chuan hripui dona kawnga pawimawh ber pakhat nia ngaih, sample test tam kawngah hmalak tum mah se, test-na kháwl thla khat chuang a ral hnu pawha Mizorama hmuh tur a la awm lo hi sorkar a inthlahdah vang nge, a leina kawngah thil fel lo a awm tih hi kan zawt a ni," an ti.
MPYCC tarlan danin, July 2, 2020-ah Covid-19 dona atana mipui pawisa thawh tlingkhawm Chief Minister's Relief Fund aṭangin district 10-a Covid-19 endikna khawl Truenat leina atan Rs. 2,01,15,000 pek chhuah a ni a; tun thlengin khawl lei chanchin hriat zui a ni lo. Sorkar thuneitute'n Covid-19 test-na ṭha mi, gold star standard RT-PCR khawl USA aṭangin chah a nih thu kumin June thla laihâwlah an sawi tawh bawk.
Hetih lai hian, Congress Legislative Party (CLP) leader Zodintluanga Ralte-in Lunglei District Hospital-a hman tur RT-PCR kháwl chawlhkar khat chhungin a chah thleng a, June 26, 2020-ah Lunglei District Hospital-ah a hlân tawh tih an sawi a, "He kháwl hi sorkar hian vawiin thlenga a la hman duh loh chhan kan zawt nghal a ni," an ti.
MPCC chuan, Mizoram sorkar notification July 30, 2020-a chhuahah, mipui a tam thei ang ber endik tum a ni tih tarlan a nih thu leh mahni duh thua test duhte tana endik man zat thlenga tarlan a nih avangin, sorkar chu khawl lei belh a tum a nih chuan a taka hma la turin an ngen a ni.