VC leh LC inthlan hun hrana Neih Congress party-in an duh

Mizoram Pradesh Congress Committee (MPCC) chuan thuchhuah siam­in, Mizorama village council (VC) leh local council (LC) inthlan awm turah, VC leh LC chu hun hranah neih an duh thu an tarlang.

MPCC chuan, "VC leh LC in­thlan hi chhan hrang hrang avangin a hranga buatsaih ni se tih hi Congress party duh dan a ni. LC leh VC inthlan a hranga neih a nih theih nan hian AMC-a Congress party councillor-te leh MPCC-te chuan July 14, 2020 khan State Election Commission (SEC)-ah ziakin ngenna an thlen tawh a ni," an ti.

Aizawl Municipal Corporation (AMC) mumal taka a kal hnuah chuan VC leh LC kalphung leh thuneihna chin a danglam tawh hle tih sawiin MPCC chuan, "VC chu state sorkar department LAD hnuaia awm a ni a, LC erawh chu mahni inrêlbàwl thei tura a puala thuneihna eng emaw zat nei AMC hnuaia awm a ni," an ti a; an danglamna tam tak a la awm tih an sawi.

Congress party tarlan danin, VC member-te lawmman chu LAD-in a pe a, LC member-te lawmman chu AMC-in a pe thung. Voter chungchangah, VC-a vote nei thei leh LC-a vote neih theih dan a inang lo a, VC leh LC chu a enkawltu leh an thuneihna a hrang bawk. Hengte avang hian VC leh LC inthlan chu a ruala buatsaih loin, a kár âwl awma buatsaih an duh a ni.