Ruling party hi anmahni thang kamah an âwk zel - Lalduhoma

ZPM leader Lalduh­oma chuan, an party-in sorkarna an chan a, auto­nomous district council-te hnena direct funding pek chungchangah sorkar laipuiin an ngaih­dan a zâwt a nih chuan ṭha taka an lo chhàn tur thu a sawi a; rorel lai MNF party chu anmahni thang lamah an âwk zel niin a sawi bawk.

Nimina ZPM pisaa inkhawmah Lalduhoma chuan, Mizoram sorkar chu kuminah cheng vbc. 640 indaih lo sain bul a ṭan tih sawiin, "Ruling party hi anmahni thang kamah an âwk zel a, an thusawiin a khak fu hlei thei tawh lo," a ti a, MNF party chu anmahni an inbei tâwk hle niin a sawi.

Mizoram sorkarin leiba tam tak a nei tih sawiin Duhoma chuan, "Kum 50 thlenga mipui rulh tur sum an pûk a, sorkar leh tur tan pawha huphurhawm khawp leh hnual rawihna tur bá an hnutchhiah dawn. Sum enkawl kawngah leh hmasawnna kawngah he sorkar hi a hlawhchham ṭhak a, hetiang sorkar hi kan la hriat ngai loh a ni," a ti.

Lalduhoma chuan, Mizorama ADC pathum­te'n AMC leh VC/LC-te angin direct-in sorkar laipui aṭanga sum dawn ve an duh tih sawiin, "Chu chu direct funding an tih chu a ni. Nikum lam daih tawh khan ZPM PAC chuan ngun takin a ngaihtuah tawh a, kan lo sorkar a, central-in kan ngaihdan min zawt a nih chuan ṭha takin kan lo chhang ang, tiin dinna kan lo tihtluk tawh sa a ni," a ti.

Lalduhoma chuan, Central-a Congress an sorkar laiin direct funding an tih ho, CSS leh a péng hrang hrangte chu Mizoram sorkar kaltlang loin implementing agency-ah pek a ni ṭhin a, BJP sorkar hnuah a kalphung tihdanglam a ni a, direct funding chu la awm thoin, state sorkar kaltlanga tih a nih thu a sawi.

CSS sum lo kalte chu state sorkarah, state consolidated fund-ah a lut phawt a, lut tawh chin chu state budget-ah pawh lantir ṭhin a ni tih sawiin Duhoma chuan, "Direct funding a nih miau avangin Mizoram sorkarin a hman ngawt theih a ni lo a, a dawngtu tur hnenah pek zel tur a ni. Pek chhuah hun bituk chhunga sorkarin a pek loh chuan penal interest chawi a ngai a, chu chu direct funding ṭhatna a ni," a ti.

ZPM Leader sawi danin, tuna kalphungah chuan CSS sumte chu ni 21 chhungin a hmangtu/neitu tur hnenah pek tur a ni a, ni 21 chhunga pek a nih loh chuan sorkar laipuiin a la lêt leh thei. State sorkarin thil dangah lo hmangin, a dawngtu tur hnenah ni 21 chhungin pe lo se, sorkar laipuiin a chhuh lêt leh dawn tihna a ni.

Budget session zawh tâkah ZPM Headquarters-in ṭha taka an thlàwp avangin an lawm tih sawiin Lalduhoma chuan, "Party mipui mai ni lo, party páwn lam thlengin mi hrang hrang puihna kan dawng nasa a, min ṭawngṭaipuitu zawng zawng chungah ZPM MLA-te'n lawmthu kan sawi tak zet a ni," a ti.