MNF-in Lungleiah rally an buatsaih; Aizawl-Lunglei kawng ṭha taka siam turin kal chungin order ka rawn pe - Zoramthanga

MNF Sub-Headquarters, Lunglei huaihawtin nimin khan Lunglei Municipal Council (LMC) inthlan tura inbuatsaihna atan Lungleiah rally neih a ni. MNF president Zoramthanga, chief minister chuan, Aizawl-Thenzawl-Lunglei kawng ṭha taka siamna turin Lunglei pana an kal pahin order a pek phei thu a sawi.

LMC campaign khuh hawnna Pûkpuia neihah Zoramthanga chuan, Aizawl leh Lunglei inkar kawng chu tunah chuan a ṭhat tâwk loh thu a sawi a, "Ṭha taka kawng siama hna thawk ṭan nghal turin PWD division hrang hrangte kal chungin order ka rawn pe phei zel," a ti.

Zoramthanga chuan, kawng lakah phone hmangin PWD Engineer-in-Chief a bia a, tih ngaite leh hmachhawpte a zâwt nia sawiin, "Chak taka hma la a, kawng siamṭhat hna thawk turin sum leh paiah harsatna kan nei lo," a ti a, Aizawl-Lunglei World Bank road chu MNF tihhlawhtlin a nih thu a sawi.

MNF President chuan, LMC inthlan­ah MNF an chak ngei a rin thu sawiin, "Kum tawp inthlanpuiah pawh chakna kan chan ngei ka beisei. Lunglei mipuiin kan candidate in lo thlan tlin ngei ka beisei a, in inchhîr hauh lo ang tih ka sawi duh. A hringtu kan ni a, hringtu ngeiin hnute tuia a châwm seilen tluka ṭha a awm lo ang," a ti.

Ṭhuamluaia Mualah Lunglei mipui duh angin êng (flood light) dah a nih dawn thu sawiin Zoramthanga chuan, "Lunglei by-pass road atana cheng vbc. 10 dah khan a daih lo lutuk a, Lunglei khawpui tana hmasawnna turah hman a ni. By pass road zawhfelna daih tur chuan cheng vbc. 330 vel a ngai," a ti a, chutiang tur chuan project siam a ni tawh niin a sawi.

ZPM chungchang sawiin MNF President chuan, "Theihtawpa inham puar a ṭulin an hria a, Pu Duhoma chu CM candidate atan an zuar. Congress leh MNF hian CM candidate a hranpain kan vuah ve ngai lo. 'Min chhin ve teh u, kalphung thar kan nei a nia' an ti a, kalphung thar hlir vawi 10 vel an nei tawh," a ti.

Zoramthanga chuan, Congress party chu beih tham an awm lo nia sawiin, "Zu zuara an tlâkchhiat lai tak khan Congress chu an bupui Delhi-ah an tlachhe vek," a ti a, Congress angin kih hnawk an sawi ve ngai lo niin a sawi.

Inkhawmah hian MNF vice president Lalthlengliana pawhin thu a sawi a, Aizawl aṭangin MNF hruaitu ṭhahnem tak an tel a ni.