JJM hrilhfiah turin khua fang dawn

PHE department leh YMA Sub-Headquarters, Mamit ten Jal Jeevan Shakti Mission (JJM)-a thawhhona an neih turah, YMA Sub-Hqrs. aṭanga Implementing Support Agency team member paruk chuan khaw hrang hranga JJM scheme hrilhfiah turin nimin zing khan Mamit an chhuahsan a; PHE executive engineer Lalzawmliana'n a vailiam.

Lalzawmliana chuan, PHE department leh Central YMA thawh dunna kal zelah, Mamita YMA Sub-Hqrs. leh PHE-in thawhhona ṭha tak an nei chuan hmasawnna a thlen thu a sawi a; JJM chu August 15, 2019-ah Prime Minister-in a hawn a nih thu sawiin, "Kum 2024-ah chuan India rama thing­tlang khaw tina in zawng zawngah tui connection an neih theihna tura hmalakana a ni," a ti.

JJM Implementing Support Agency team hian Kawrthah leh Zawlnuam sub-division chhunga khua pariat an tlawh dawn a; JJM kalphung leh mipui tana a ṭhatna te, chak zawka scheme kalpui theih dan turte an hrilhfiah dawn a ni.