Governor-in NHIDCL hotute a kâwm
Governor Dr Hari Babu Kambhampati chuan nimin khan Raj Bhavan-ah National Highways & Infrastructure Development Corporation Ltd. (NHIDCL) hotute a kâwm a; national highway thlûr hnih (two lane)-a siamte chu March 2024-ah hman theiha siam zawh a ngaih thu a hrilh.
Dr Hari Babu Kambhampati chuan, Aizawl-Vairengte inkar kawngpui thlûr li (four lane)-a zauh tur chu la thawh theih rih loh mahse NH thlúr hnih tura siam mekte 60% zawh a ni tawh chu lawmawm a tih thu a sawi a, "In hnathawhnaah harsatna in neihte chinfel zung zung dan in dap thiam a ngai a, March 2024 a thlen chuan two lane kawngpuite hi hman theih tura siam zawh hman a ngai," a ti.
Mizoram tan kawngpui ṭha leh rél kawngte a pawimawh tih sawiin Larsap chuan, hmasawnna ruhrel lian tham leh pawimawhte siam zawh a nih hunah chuan Mizoram economy nasa takin a danglam dawn niin a sawi.
NHIDCL hotute hi director Virender Jokhar hoin an tel a; an hmasawnnate leh harsatnate Governor hnenah an thlen a ni.
Inkawmnaa tarlan danin, NHIDCL hian Mizorama national highway siam tur km. 888-a thui an neih zinga km. 248 an siam zo tawh a, km. 560-a thui an la hmabak bakah, km. 80-a thui siam belh an tum a ni.