Mi vit hlumtu nia hriat man

March 5, Pathianni chawhma dar 11 vela Ainawn Venga mi pakhat vit hlumtu Lalawm­puia (25) s/o Khiang­hlun­chhungi, Ainawn Veng nia inchhál chu nimin chhun dar 11:15 khan Bilkhawthlirah man a ni.

Thu dawn danin, Ainawn Venga khawsa Lalawmpuia hian Pathianni chhun khan Ainawn Venga an ṭhen­awm in pakhat rawk a tum a, ina lo awm Ginkhansiam (33) s/o Tualzachhina, North Hlimen chu a vit hlum a ni.

Ginkhansiam hi Ainawn Vengah hian mi in luahin a nupui nen an khawsa a, a nupui zin lai a ni. Hliam na tak tuarin an ṭhenawmte'n an hmu a, Ebenezer Medical Center panpui a nih hnu lawkah a hliam tuar loin a thi. A ruang chu an khua North Hlimen panpui a ni a, nimin khan vui a ni.

Ginkhansiam thattua ngaih Lalawmpuia chu a tlanbo nghal a, Kolasib tlangdung lamah hmuh a nih avangin Kolasib leh a chhehvel khua-a YMA member-te'n an zawng a, nimin khan Bilkhawthlir Tuiṭha Veng YMA-te'n Bilkhawthlir leh Buhchang inkarah manin, Bilkhawthlir police hnenah an hlan a ni.