KHAWTHLIR

Bike chesualah mi pahnih an thi 
March 5, Pathianni zan dar 8 vel khan Lalṭhazuala s/o Lalhmangaiha (L) leh Malsawmdawngliana s/o SR Lalpianfela (L), Kawnpui Chhimveng ve vete chu Sairang péngah bike-in an chesual a, an thi ve ve. Thu dawn danin, Lalṭhazuala leh Malsawmdawngliana hi bike-in an inphur a, kawng sira truck chhia dinglai an sú a ni.

2G ethanol sawiho
Planning Board vice chairman H Rammawi kaihhruaiin nimin khan sorkar hotute leh company hotute'n Secretariat conference hall-ah mau aṭanga 2G ethanol siam dan tur an sawiho. Round table conference of state officials and potential investors-ah hian Mizorama 2G ethanol siamna din tura ZoGreen leh GPS Renewables thawh dunnaa rawtnate leh hmalak dan turte sawiho a ni.

MNF inkhawm
MNF chuan nimin khan an party pisa, Mizo Hnam Rûnah chhung inkhawm an hmang a, Land Revenue & Survey Board vice chairman Rochhunga Ralte, MNF adviser-in thu sawiin, "Pathian leh kan ram tan tihah kan hotute an ding nghet a, manifesto tihhlawhtlin tam tak leh pawimawh tak tak MNF-in a nei," a ti.

ZPM MLA-te chhuang
ZPM party-a Ṭhalai, Zonu leh Upa Committee-te chuan thuchhuah inṭâwm siamin, Mizoram Legislative Assembly pariatna budget session neih zawh tâka ZPM Legislature Party member-te chêt dan an chhuan thu an tarlang a, an hun kal zel tur atan duhsakna an hlàn. ZPM frontal wing-te hian an MLA-te hnenah hian nimin khan an party pisaah chawimawina pangpar leh thilpek an hlân a ni.

Helmet khum turin hriattir
Mizoram Police-a Security SP Rex Zarzoliana chuan nimin khan hriattirna (circular) chhuahin, Security unit mi leh sa, two wheeler khalhtu leh a hnunga chuang (pillow rider)-te chu ISI pawm chin helmet khum ngei turin a hriattir. Circular hi November 11, 2016-a Supreme Court thupekin two wheeler khalhtu leh an mi phurhte'n ISI pawmpui chin helmet khum ngei tur a tih avang leh March 1, 2023-a Police Headquarters thuchhuak anga chhuah a ni.