District khawpui fai ber nihna lâwm

Khawzawl khawpui chuan nimin khan Zaingen Branch YMA Hall-ah Mizoram Khawpui Fai Intihsiakna, 2022-a district khawpui fai ber an nih an lawm a, deputy chief minister Tawnluia, bialtu MLA-in hmanpuiin, khawpui chhunga VC-te hnenah an huam chhung khawlaia dah tur bawlhhlawh báwm lian a sem.

Tawnluia chuan, Khawzawlin district khawpui fai ber leh Khawzawl Dinthar VC-in an district-a VC area fai ber lawmman an dawng chu a lawmpui thu sawiin, "Faina leh thianghlimna hi hmasawnna kawnga pawimawh tak a ni a, faina kawnga inzirtirna leh inkawhhmuhna tam zawk neih zel a pawimawh," a ti a, fai reng turin taimak leh thawhhona ṭha a ṭul thu a sawi.

Bawlhhlawh paih turte hmanga thil hlu leh ṭangkai zawk siamna lama hmalakna ngaih pawimawh zual a duh thu sawiin Tawnluia chuan, "Sorkarin North East Special Infrastructure Development Scheme (NESIDS) hnenah urban town-a bawlhhlawh thliar hranga sawngbawlna hmun solid waste management centre siamna tur cheng vbc. 10.5 hù project a thehluh chu pawm a ni tawh a, hemi atan hian state budget aṭangin cheng vbc 50.45 dah a ni," a ti.

Deputy Chief Minister chuan, chenna in tinah inthiarna 7,000 chuang siam tura ruahman zinga 400 chu Khawzawl tan dah a nih thu leh vantlang inthiarna pawh Khawzawlah pahnih siam tum a nih thute a sawi bawk.