Police 2 kap hlumtu chêt dan an dem

MNF party leh Chakma páwl hrang hrangte chuan thuchhuah siamin, Hav. Bimal Kanti Chakma-in a thawhpuite Hav. J Lalrohlua leh Hav. Indra Kumar Rai a kâp hlum chu an dem thu an tarlang.

Central Young Chakma Association, Central Mizoram Chakma Students’ Union leh Central Chakma Mahila Samiti-te chuan thuchhuah inṭâwm siamin, Hav. BK Chakma chêt dan chuan Mizoram mipui a ṭhàwn thu leh an dem thu an tarlang a, "Hav. BK Chakma chêt dan hi na takin kan dem. Amah hi man a ni tawh a, dan ang taka hma la turin thuneitute kan ngen a ni," an ti.

Chakma pawl pathumte chuan, mitthi chhungte an tawrhpui tak zet thu an tarlang a; thil thleng avanga harsatna siam lo tur leh remna leh rálmuanna vawng nung turin mipui an ngen bawk.

MNF thuchhuah chuan, Hav. BK Chakma chêt dan an dem thu leh lusún chhungte an tawrhpui thu tarlangin, "Ramri vên hna ngawrh taka thawktute karah hetiang thil duhawm lo tak hi thleng nawn tawh lo se kan duh tak zet," a ti a; Mizoram sorkarin BK Chakma rang taka a man leh a hna aṭanga a bàn nghal leh vanduaina tâwk ta chhungte hnenah zangnadawmna atan hna pek thlenga sorkarin hma a la nghal chu lawmawm an tih thu a tarlang a ni.