MZP bul tumin Zoram Ni hman a ni

MZP buatsaihin nimin khan Cultural Centre cum Auditorium, Vaivakawnah Zoram Ni hman a ni a, Rajya Sabha MP K Vanlalvena'n a hmanpui.

K Vanlalvena chuan, March 5, 1966 chu Mizote tan tawrhna rapthlak tak a ni tih hriat thar a pawimawh thu sawiin, "Hetianga hun kan hman hian India sorkar lakah inlâk hran tum lehna ni loin, kha tih hun laia Mizo mipui tawrhna kan hre reng a, chu chuan ram leh hnam hmangaihnaah harh thar lehna min petu ni se," a ti.

MNF-te'n zalenna an sual lo tih tun hnaiah sawi a awm ṭhin thu sawiin K Vanlalvena chuan, "Thil hriat fuh tâwk loh vang a ni. Bomb hmanga beih hial kan nih hnuah party inan loh vanga tun hnuah hetiang sawi a awm ṭhin hi a pawi a, Mizoram history nuai reh tumna a ni," a ti a; Mizo nationalism chu bomb hmangin tireh chi a nih loh thu a sawi.

Rajya Sabha MP hian B Vanlalvuana lehkhabu ziah, 'Ram zûn ngaih leh di zûn' tih a tlangzarh a, lehkhabu hi rambuai lai chanchin ziahna a ni.

MZP president Lalnunmawia Pautu pawhin thu sawiin, ram leh hnamin hun harsa a tawh chu theihnghilh chi a nih loh thu a sawi a, "Phuba lâk tumna leh thinrim tharna tur a ni lo a, hnam anga ṭanrualna leh inpumkhatna ní atan i hmang ang u," a ti.

Zoram Ni hi kum 1966-a India sipaite'n jet fighter leh bomb hmanga Aizawl an beih ní, March 5, 1966 hriatrengna atan hman ṭhin a ni a; kuminah chuan Pathianni a nih avangin nimin khan hman niin, mi sâwm bik kal khawmte kawm an ni.