Mizoramah Cyclothon huaihawt a ni

Comprehensive Primary Health Care through Health & Wellness Centres (CPHC-HWC) leh National Health Mission (NHM), Mizoram chuan nimin khan Mizorama district tinah Cyclothon (cycle rally) an huaihawt a, thupui chu 'Healthy Women, Healthy India' tih a ni.

Cyclothon hi Ministry of Health & Family Welfare thuchhuak bawhzuiin International Women's Day (March 8) pualin hman a ni a, district hrang hrangah chief medical officer hoin medical officer-te leh khawtlang hruaitute'n an hmang a ni.

International Women's Day-in a tum chu, hmeichhiate hriselna chawi kânna tura pawimawh, taksa leh rilru hrisel neih pawimawhzia te, taksa insawizawi ṭangkainate zirtir a ni a; hmeichhiate chu an hriselna dinhmun ngai pawimawh a, health sub-centre leh health & wellness centre pan nachang hre tura chah an ni.