Champhai damdawi-inah ICU khum pe

Mission ICU chuan nimin khan Champhai District Hospital hnenah intensive care unit (ICU) khum 10 leh a ken tel hmanraw mamawh hrang hrang cheng nuai 40 hû an hlan a, Health & Family Welfare board vice chairman Dr ZR Thiamsanga, Champhai North bialtu MLA-in a hmanpui.

Mission ICU kaltlanga hmanraw hlante chu - ICU khum 10, monitor para panga leh two function ICU cots unit 10 bakah, ventilator, bipap, syringe pump leh infusion pump unit hnih ṭheuh a ni.

Dr ZR Thiamsanga chuan, Champhai District Hospital-ah cheng vbc 14.5 hmangin critical care block siam tum a nih thu leh sum ruahman a nih tawh thu a sawi a, "Nursing School hostel sak mek a ni a, a rang lama Nursing School kalpui a nih theih nan sorkarin hma a la," a ti a; trauma centre puitlin a nih theih nan theihtawp chhuahho a ṭul thu a sawi bawk.