MZP-te Aizawla Chakma House bulah an kalkhawm, buaina lian a thleng lo

March 5, Pathianni zana Hav. Bimal Kanti Chakma-in a police-pui pahnih Hav. J Lalrohlua leh Hav. Indra Kumar Rai te a kah hlum avangin MZP hruaitute chu Pathianni zan khan Central Jail bulah leh Chakma House, Hunthar Veng bulah an kal khawm a, buaina lian tham erawh a chhuak lo.

MZP hian BK Chakma chu a hna aṭanga bàn an phût a, MSU pawhin ban an phût bawk. MZP hruaitute chu an hmalakna bawhzuiin Pathianni zan khan an che chhuak nghal a, MSU erawh chuan press release an siam bâk chu hmalakna an nei rih lo thung.

MZP thuchhuah chuan, Hav. BK Chakma-a'n Hav. J Lalrohlua a kâp hlum chu hriatthiam har an ti a, chuvang chuan Pathianni zan khan MZP pisaah emergency meeting a nei tih an tarlang a, "Tualthattu Hav. BK Chakma chu a hna aṭanga a rang thei ang bera bàn nghal turin thuneitute kan phût a, pawikhawihtu hi bàn a nih hma chuan Mizoram chhungah Chakma páwnchhuah khap a ni," an ti.

Police aṭanga thu dawn danin, MZP mi leh sa mi 20 vel chu Pathianni zan khan Central Jail bulah an kal a, a hnuah Chakma House bulah an kal leh bawk. Chakma House bulah hian police-te nen rei vak lo an innawr a, mahse, buaina leh harsatna lian tham a chhuak lo thung.

MSU pawhin thuchhuah siamin, Hav. BK Chakma chêt dan chu an dem tak zet tih an tarlang a, "Mizo hnam tana pawi khawihna nasa takah kan ngai. BK Chakma hi dan anga a na thei ang bera hrem kan phût a, darkar 12 ral hma ngeiin a bànna order Mizoram sorkarin tichhuak ngei turin kan phût a ni," an ti.