Lokayukta-ah post ruak 13 a awm; Investigation Wing din a la ni lo
Mizoram Lokayukta-ah post ruak hnawhkhah loh 13 a awm mek. Lokayukta hian enquiry/investigation wing a la nei lo a, dinsak tura ngenna Mizoram sorkar (Chief Secretary) hnenah ṭum hnih an thehlut tawh.
Vigilance department aṭanga thu dawn danin, Mizoram Lokayukta hnuaiah sanction post 42 a awm a, chu'ng zinga 29 chu hnawhkhah a ni tawh. Tuna thawktute chu regular appoinment pahnih, part time-a thawk pakhat, sorkar department dang aṭanga pawh (deputation) panga, contract-a thawk pakhat leh provisional employee 20 an ni.
Lokayukta-in thil chhui tura a hman ber ACB chu Lokayukta hnuaia awm a nih loh thu sawiin Vigilance department hotute chuan, "ACB hi Mizoram sorkara Vigilance department hnuaia awm a ni," an ti.
Vigilance department hotute sawi danin, Lokayukta chu independent statutory body a ni a, danin a bituk angin thawktu tur pek an la nih loh avangin enquiry/investigation wing din a la ni lo. Chuvang chuan, thil chhui (enquiry/investigation) hnate chu ACB hnenah pek ṭhin a ni.
Lokayukta chuan complaint an dawnah Central Bureau of Investigation (CBI) chhui chian tura rawtte pawh a nei tawh a, mahse, Mizoram sorkar phalna a ngaih avangin CBI chhuitir tak erawh a la awm lo nia thu dawn a ni.
Vanglaini-in document a neiha a lan danin, Lokayukta hian enquiry/investigation wing atana thawktu tur la tura ngenna Mizoram Chief Secretary hnenah ṭum hnih an thlen tawh a; October 22, 2021-ah leh August 25, 2022-ahte an thlen a ni.
Lokayukta chuan investigation wing din tura Chief Secretary hnena ngenna an thehluh hnuhnung zawkah hian kum 4 vel Lokayukta a din tawh hnuah pawh enquiry/investigation wing an la neih loh thu a tarlang a, "Post thar siam kher a ngai lo a, ACB aṭanga post transfer mai pawhin tih theih reng a ni," a ti.
ACB aṭanga post 24 chu Lokayukta-a sawn (transfer) turin April 4, 2021 khan Council of Minister-in a pawm tawh thu tarlangin Lokayukta chuan, ṭha taka an kal theihna atan a rang lama hma laksak turin Chief Secretary an ngen a ni.