KHAWTHLIR

Thisen pe
T Romana College NSS unit chuan nimin khan an college-ah blood donation camp an huaihawt a, Civil Hospital, Aizawl tan thisen unit 44 an pe. Thisen petute hi 6th semester zirlaite an ni a, zirlai mipa 37 leh hmeichhia pali bakah, zirtirtu pathum an ni.

INC candidate
Congress party president Lalsawta chuan March 29, 2023-a Lunglei Municipal Council inthlanpui awm tura an party candidate turte vawiin hian Lungleiah a puang dawn nia thu dawn a ni a; campaign hawnna inkhawm hman a ni bawk ang.

LMC inthlan atan inbuatsaih
Lunglei municipal election officer Ramdinliani, district bawrhsap hoin nimin khan DC conference hall-ah Lunglei Municipal Council (LMC) inthlan March 29, 2023-a neih tur sawiho a ni a; hmalakna turte sawiho niin, mawhphurhna chelhtu turte ruat a ni. LMC inthlan hi March 29, 2023-ah neih tur a ni a, April 4, 2023-ah vote chhiar a ni ang.

Helmet khum phal chin hriattir
Kolasib SP chuan hriattirna chhuahin, Kolasib district-a two wheeler khalhtute chu Bureau of Indian Standards (BIS)-in a pawm chin leh a tlukpui helmet khum turin a hriattir a, April 1, 2023 aṭangin khauh lehzualin dan kenkawh a nih tur thu a tarlang. Mizorama hman lâr satel helmet chu BIS standard tling lo a nih avangin khum phal a nih loh thu a tarlang bawk.