AWC-in NAAC grade B++ an lawm

Aizawl West College chuan nimin khan Luangmuala an college-ah National Assessment and Accreditation Council (NAAC) B++ grade an hmuh an lawm a, College Week khârna hun an hmang nghal.

Inkhawma khuallian minister Lalruatkima chuan, NAAC-in college an endiknaah college campus hmunhma rualrem lo chu tihnufûmtu a nih ṭhin thu sawiin, "Khawpuia college-te hmunhma ṭha zawk sorkar hotute'n an ruahmansak zel hi a lawmawm. CM Pu Zoramthanga, HTE minister Dr R Lalthangliana leh bialtu MLA Pu Zothantluanga te hmalakna zarah Aizawl West College hmunhma thar tihfel a ni hi a lawmawm," a ti.

Aizawl West College chu harsa taka bul ṭan, principal, zirtirtute, zirlaite leh alumni ṭhahnemngaihna zara hmasawn zel a nih thu sawiin Lalruatkima chuan, "Lehkha zir hi kawng engkima hmasawnna a ni tih hre chungin in thiam leh theihna tipung zel ang che u," a ti a; taksa enkawl uluk a, hriselna ngai pawimawh tur leh, zûk leh hmuam leh ruihhlo laka inthiarfihlim turin zirlaite a fuih.

Minister chuan, social media hman kawnga fimkhur thar tur leh Mizo hnam dinchhuah leh hmasawn zelna atan fa neih tam lama ṭan la thar turin kalkhawmte a chah bawk.

Inkhawmah hian College Week inelnaa ti ṭhate hnenah Minister-in lawmman a hlàn a; Aizawl West College vice principal Dr Samuel VL Thlanga'n NAAC assessment period (2017-2022) chhunga college hmasawnnate a tarlang.

Aizawl West College hi May 2, 1990-ah din a ni a, zirlai 1,098 leh zirtirtu 43 an awm mek a ni.