LMC-a sorkar turah MNF President a inngai

MNF president leh chief minister Zoram­thanga chu March 29, 2023-a Lunglei Municipal Council (LMC) inthlan turah Lunglei a chàm chilh a; LMC-ah MNF an sorkar ngei dawn thu leh sorkar tura mamawh zat seat an neih dawn thu a sawi.

Nimina Lunglei Mizo Hnam Runa inkhawmah Zoramthanga chuan, LMC inthlan turah MNF party-in candidate tur eng emaw zat an tihfel tawh thu a sawi a; sorkar ngei tura hma an lak tur thu sawiin, "LMC seat 11 awmah hian lâk vek kan duh a, Pathianin sorkarna siam tura kan mamawh zat seat min pe dawn a ni," a ti.

Zoramthanga chuan, MNF vice president a nih laiin Laldenga awm loh hlanin kum 7 a kaihruai thu sawiin, "MLA tlemtê tê chauh kan neih lai khan kan party-ah ka kaihhruainaa sorkar zawh ring lote an awm a, Pu Lalfakzuala hnenah a inah president ka nihna min thlak turin Pu Tawna nen kan kal a, ani chuan a lo pawm lo nasa mai. Party dang hotute hian mahni president nihna mi dang kian tura an ina kal chilh an awm ve hauh lo ang," a ti a; MNF chu party entawn tlak ber niin a sawi.

MNF chu kum 60 chuang rinawm taka kal a nih thu sawiin Zoram­thanga chuan, "Congress leh ZPM-te angin a nghîng ve lo. Lungawi lohna ho tê têin a ngam loh lungphûm chunga rem chhoh kan ni," a ti.

MNF President chuan, kumin kum tàwp lama Mizoram inthlan­puiah an sorkar leh ngei an inrin thu sawiin, "Congress hian pahnih khat MLA an neih chuan an vannei hle ang. ZPM pawh Assembly session neih zawh tâkah khan a dik leh dik lo tih an hriat chian loh pawh an aupui dum dum a, ngaihdam an dilte a ngai leh hial a nih kha," a ti a; MNF sorkar chu eptute'n beihna tur lian tham an hre lo niin a sawi.

Inkhawmah hian MNF zawm thar mi 101 lawm luh an nih thu MNF thuchhuah chuan a tarlang a; MNF vice president Lalthlengliana leh adviser Dr R Lalthangliana te pawhin thu an sawi a ni.