Infiamnaa hmasawnna tur firm 2/1-in sum tam tak an hai lut - Zodintluanga
Congress Legislature Party (CLP) leader Zodintluanga Ralte chuan, infiamna lama Mizoram hmasawnna turah Mizorama consultancy firm pahnih khatin sum an hai lut ruih ruih niin a sawi.
Thénhlûm khuaa nimina Thorang A/C MLA Cup 2023 a hawnnaah thu sawiin Zodintluanga chuan, "Tun hnai kum li chhung leka infiammite tana hmasawnna thar hmuh tur aia Mizorama consultancy firm pahnih khatte'n sport hmasawnna tur sum tam tak an hâi lût ruih ruih mai hi a pawi," a ti a; chutiang chu ni mah se, rilru tihnual lo turin infiammite a chah.
Zodintluanga Ralte chuan, infiammite politics khelhna atana hmang ve lo tur leh Mizoram rorelna sang ber Assembly House-a an hming hial mualpho taka lam ri lo tur sorkar Mizoramin a nei ṭêp niin a sawi a, "Mizo ṭhalai infiammite tan káwl a êng leh thuai dawn a, infiammite politics khelhna atana hmang ve lo tur sorkar kan nei leh ṭêp tawh a ni," a ti.
CLP Leader chuan, Congress sorkar laiin khawpui chhungah ringawt talent a awm lo tih an hriat chian avang leh India ram leh khawvela lang turin thingtlangah talent nei tam tak an awm tih an hriat chian avangin district hrang hrangah sport stadium leh academy-te an din thu leh, thingtlang khaw tam zawkah hmunhma an neih dan azirin sport complex-te din a nih thu a sawi bawk.