Provincialise thuai turin sorkar ngen

Mizoram Govt. Ad hoc Aided School Teachers Union (MIGASTU) chuan thuchhuah siamin, adhoc aided school-te pro-vincialise a nihna tura cabinet agenda-ah telh an la ni ngai lo chu an rilru a na tak zet tawh tih an tarlang a; a hma thei ang bera provincialise turin Mizoram sorkar an ngen.

Nimina MIGASTU hruaitute ṭhukhawm chuan thuchhuah siamin, "Adhoc aided school-te hi kum 15 zet kan dinhmun ngaia kan awm tawh hnu leh kan member tam takte'n mai pár thlawna min pension san mek lai hian, a hma thei ang bera provincialise status-a min hláng kai thuai turin sorkar kan ngen nawn leh a ni," an ti.

MIGASTU chuan, "Adhoc aided school-te provincialise kan nihna turin cabinet agenda-ah telh kan la ni pha ngai lo hi kan rilru a na tak zet tawh," an ti a; cabinet meeting awm leh hmasa berah provincialise an nih ngeina turin agenda-ah dah a, pawm a nih ngei an beisei thu an tarlang.

Hetih lai hian, MIGASTU chuan, School Education minister Lalchhandama Ralte-in Assembly budget session-ah sikulte dinhmun sang zawka hláng kái tura hma a lak mek thu a sawi chu lawmawm an tih thu an tarlang bawk.