CYMA-in YMA hnena EFCC sum peknaa thil dik lo titu hrem an phût

Central YMA chuan, kum 2021-22 chhunga ram kâng vênna atana Environment, Forest & Climate Change (EFCC) department-in YMA branch-te hnena sum a pek chhuah anga tarlan leh YMA-te dawn zat inmil lo chu chhui chian a, thil dik lo titu hrem ngei an phût thu an tarlang.

ZONET Cable TV Pvt. Ltd. chanchin tharah, kum 2021-22 chhunga ram kâng vênna tura EFCC department-in YMA branch leh joint-te hnena CAMPA sum an pek chhuah zat leh YMA-te dawn a inmil loh thu puan a ni a; thil dik lo a awm nia a lan avangin YMA Central Executive Committee chuan March 6, 2023 zan khan ṭhukhawmin an ngaihtuah a ni.

CYMA chuan, "Ram kâng vênna atana sum pek chhuah leh an dawn inmil lo awm hi YMA CEC meeting chuan a ngai thutak hle a, pawisa kawngbo awm nia lang hi chhui chhuah ngei ni se, a ti dik lotute chungah an phu tâwk hremna pe ngei turin thuneitute kan phût tlat a ni," an ti.

ZONET puan danin, EFCC department-a Aizawl Forest Division chuan kum 2021-22 khan nungcha leh ramngaw humhalhna lam hawi puanzarna atan YMA branch 49 hnenah cheng nuai 12 a pe a; chutih laiin, YMA branch leh joint eng emaw zat chuan sum an dawn zat anga tarlan chu a takin an dawn loh thu an sawi. A taka sum an dawn zat chu EFCC department-in an pek zat an tarlan zatve tling lote a ni hlawm.

Chanchin thara puan a nih hnuah sum pek chhuah laia Saituala forest range officer Lianchuailova, tuna pension-a chhuak tawh chuan YMA, Saitual Group hnuaia branch pakua hnena sum an pek kim loh chu Saitual Group hruaitute hnenah March 6, 2023 khan a hlan leh hnuhnawh a, sum a pek leh chu Rs 2,55,000 a nih thu ZONET chuan an tarlang.

March 6 vêk khan EFCC department mite chuan Chhimphei Group YMA chhunga branch hrang hrang hnenah pawisa an pe kual leh nia tarlan a ni bawk.