Muallungthua MSSC Sports Complex hawng; Holiday sport buatsaih tum a ni - SYS Minister

Muallungthua Mizoram State Sports Council (MSSC) Sports Complex din thar chu nimin khan Sports & Youth Services minister Robert Romawia Royte-in a hawng. Minister chuan, Sports department-in holiday sport buatsaih turin hma a lak mek thu a sawi.

Robert Romawia Royte chuan, holiday sport buatsaih turin SYS department-in hma a la mek tih sawiin, "Holiday hi zirlai naupang leh ṭhalaite chuan phone khawih nan an hmang nasa a, hei hian an rilru leh taksa hriselna nasa takin a tihniam. Holiday sport buatsaih a nih chuan naupang, ṭhalai, nu leh pate’n playground-ah taksa sâwizawiin hun tam zawk an hmang ṭhin ang a, an rilru leh taksa hriselna nasa takin a pui thei ang," a ti.

Ei leh bara intodelh tur leh thil tam zawk siam chhuak turin hriselna ṭha neih a pawimawh thu sawiin Minister chuan, "Rilru leh taksa hrisel nei turin Sports department chuan hma a la mek zel. Mizoram hmun hrang hrangah ṭhalaite infiamna tur buatsaih mek zel a ni a, ṭhalaite'n an chhawr ṭangkai hle," a ti a; sorkarin infiamna chi hrang hrangte tihmasawn turin chak taka a kalpui thu a sawi.

Mizorama phûl lem phahte chu ṭha tak tak a nih thu leh FIFA quality test paltlang tawhte pawh a awm thu Robert Romawia chuan a sawi bawk.

MSSC Sports Complex, Muallungthuah hian football khelmualah phûl lem phah a ni a, chuta tan chuan sorkar laipuia Ministry of Youth Affairs & Sports hnuaia Khelo India aṭanga hmuh cheng nuai 500 hman niin, ACT Global company, USA-in an siam a ni.

MSSC Sports Complex hawn zawhah SYS Minister chuan Aizawl South-III MLA Football Tournament a hawng nghal bawk.

Sports complex hawnna leh football tournament hawnna inkhawmah hian bialtu MLA Prof. F Lalnunmawia, SYS secretary Dr Lalrozama leh director K Lalrohlua te pawhin thu an sawi a ni.