Kan ri ṭhak ṭhak dawn - MPYCC President

Congress ṭhalai, MPYCC chuan nimin khan Congress Bhavan-ah Executive & Organiser meeting an nei a, Lunglei Municipal Council inthlan awm tura hmalak dan tur an rél. MPYCC president Dr Lalmalsawma Nghaka chuan, theihtawp an chhuah dawn a, an rîk ṭhak dawn thu a sawi.

MPYCC President chuan, "Pathian leh mipui zara kan sorkar a nih chuan eptu kan nih laia sorkar dik lohna khalh ngîl kawnga kan ri ṭhak ṭhak ang thoin mipui beisei leh duhthusam sorkar kan neih ngei theih nan keimahni sorkar siamah pawh a ṭul angin Congress ṭhalaite'n theihtawp kan chhuah ang a, kan ri ṭhak ṭhak dawn a ni," a ti.

Dr Lalmalsawma chuan, Congress sorkar laia Lunglei khawpui tana hmasawnna hna thawh kawngah sorkar mek MNF-te'n Congress sorkar kal ta an tluk lo hle niin a sawi a, "Lunglei mipui thlavâng hauh ngam lo Lunglei bial ṭhenkhata MNF MLA-te hian MNF sorkar dinhmun an tichiang hle," a ti. Congress sorkar laia an hnathawhte hre reng a, LMC inthlanah Congress party candidate-te vote vek turin Lunglei mipui a ngen a ni.