Buarpui PHC sak mek vuak chhiat a, a thara sak ṭhat ZPM Ṭhalaiin an duh

ZPM Ṭhalai Gen. Hqrs chuan, Lunglei district-a Buarpui Primary Health Centre (PHC) sak mek chu a chhiat em avangin vuak chhiat vek a, a thara sak ṭhat ni se an duh thu an tarlang.

ZPM Ṭhalai hruaitute chuan Buarpui damdawi-in sak meka slab chhùn March 6, Thawhṭannia chim chu a hmunah an enfiah a; "Building sak a nih dan a chhe hle a, slab atana iron rod hmante pawh ring rod atana hman ṭhin, sín tê tê a ni hlawm a, slab atana rod phan dan pawh a rinawm lo hle. Ban leh ban inkar a zau a, slab chimna beam-te pawh a khi nasa. Beam-te hi chhûng ṭha leh turin kan phût a ni," an ti.

ZPM Ṭhalai tarlan danin, Buarpui PHC saknaa hna thawktute leh supervisor an zawhfiahnaah, in sakna atan cheng nuai 39 chuang dah a ni a, mi pathumin an inthawh ṭâwm a ni.

Bualpui NG khuaah damdawi-in sak chhe lutuk avangin mipui thinrimin an chhu chhe tawh tih sawiin ZPM ṭhalaite chuan, "Thla tam pawh a vei hmaa Buarpui PHC sak hna chhe tak mipuiin kan hmu leh ta mai hi MNF sorkar hnuaia Health department hlawhchhamna lian takah kan ngai. A changtu minister hian Health department a enkawl zo loah kan ngai a ni," an ti.

ZPM Ṭhalai chuan, "MNF sorkarah department hrang hranga contract hna chhe lutuka thawh a ni ṭhin hi mipui hmuhsitnaah kan ngai," an ti a; Buarpui PHC pawh sak zawm chi loh khawpa chhiaa sak a nih avangin, chhiatna lian zawk a thlen hmaa vaw ṭhiat a, a thara sa ṭha turin sorkar an phût a ni.