LMC inthlan a felfai theih nan mi tin ṭawiawmna ngen

Lunglei district municipal election officer Ramdinliani, district bawrhsap chuan Lunglei Municipal Council (LMC) inthlan chungchangah nimin khan thuchhuah a siam a; inthlanna felfai leh muanawm a awm theih nan mi tinte ṭawiawmna a ngen.

LMC inthlanpui hmasa ber tur Lunglei district tan méllung pawimawh a nih thu tarlangin Bawrhsap chuan, "Inthlanna dik, felfai leh muanawm tak kan neih theih nan inthlanna buaipuitu, political party, media, kohhran, NGO leh mipui ṭawiawmna kan ngenin thawhhopuiah kan sáwm a. March 29 hian democracy (mipui rorelna) tihlawhtling tura vote thlak ṭheuh turin Lunglei municipality chhunga vote nei zawng zawng kan sáwm a ni," a ti.

Bawrhsap tarlan danin, LMC-ah hian ward 11 a awm a, councillor-te chu kum nga term atan thlan a ni ang. October 14, 2022-a tlangzarh LMC final electoral roll hman a ni dawn a, electoral roll-ah chuan vote nei mi 40,548 an awm a, mipa 19,123 leh hmeichhia 21,245 an ni.

LMC inthlanah hian ward 11-ah polling station 44 a awm dawn a, vote thlakna atan electronic voting machine (EVM) hman a ni ang.