Bawlhhlawh sâwngbàwlna hmun enfiah

Kolasib district bawrhsap John LT Sanga hoin nimin khan sorkar hotute'n Rengtetlanga bawlhhlawh paihna hmun leh Solid Waste Management Centre (SWMC), Dihmuntlang an endik.

John LT Sanga chuan, Rengtetlanga bawlhhlawh paih ṭhinna hmun chu National Green Tribunal thuchhuak bawhzuia Mizoram sorkarin ram leilung leh a chhunga cheng nungcha leh mihringte hrisel zawkna atan hman chhunzawm loh tura tih a nih thu a sawi a; Dihmuntlanga SWMC chu ṭangkai zawka hman a nih theih nan sorkar department hrang hrangte nen ruahmanna siam turin endik a nih thu a sawi.

Bawlhhlawh paihna hmun endiknaah hian environment engineer PC Lalmuanpuii chuan, Rengtetlanga bawlhhlawh paihna hmun chu hmunhma rem lo leh ko sang tak a nih avangin NGT duh dan angin, hmang chhunzawm lo tur leh bawlhhlawh awm sa thiar chhuak tura hma la turin NGT-in a phal angin sorkar laipuia Central Public Health & Environmental Engineering Organisation leh Central Pollution Control Board-te ràwn hmasak a ṭhat thu a sawi.

Endiknaah hian beisei anga vermi-composting kalpui theih a nih loh chhan te, forest clearance la hmuh loh vanga land fill hman ṭan a nih loh thu te, phai lam aṭanga bawlhhlawh ṭawih thei sawngbawlte leitu tur mumal an awm loh thute sawi a ni.