HTE Board-in hmalakna tur sawiho

Higher & Technical Education Board chu nimin khan Secretariat conference hall-ah an ṭhu a, an chairman Dr R Lalthangliana, HTE minister-in kaihruaiin, hmalakna tur hrang hrang an sawiho.

Dr R Lalthangliana chuan, Covid-19 vangin zirna sang zawk zir turin phai lamah zirlai an kal theih dawn lo a, zirlai tam takin Mizoram college-ah zirna an chhunzawm a ngaih dawn thu a sawi a, "Zirlai a tam thei ang ber college-te'n an admit theih nan sorkarin theih­tawp chhuahin rem a ruat mek a ni," a ti.

HTE Board vice chairman Dr Vanlalṭanpuia, MLA chuan, tun hnaia sorkar laipuiin zirna kal­phung thar New Education Policy a tihchhuah chung­chang sawiin, "Kalphung tharah thil thar inthlak a tam a, state-te kan inher rem hle a ngai dawn a ni," a ti a; NEP thar vangin board-in pawimawhna a neih nasat tur thu a sawi.

Ṭhutkhawmah hian Mizoram University (MZU) southern campus, Lungleia dinna tur leh chumi atana state sorkar­in ram a pek tur chung­changa hmalak tawhna te, college-te tihchang­tlunna atana RUSA hnuaia hlawhtlinna leh hmalakna te, RUSA hnuaia Pukpuia Mizoram Engineering College sak zawh tawh dinhmunte leh Quality and Excellence in Higher Education neih dan turte an sawiho a ni.