Covid-19 vei dam tawh Mi 16 chhuahtir an ni

Nimin khan Aizawl, Lunglei leh Lawngtlai district-ah Covid-19 vei dam tawh mi 16 chhuahtir an ni. Heti hian Mizorama Covid-19 vei hmuh chhuah tawh mi 501 zinga mi 282 chhuahtir an ni tawh.

Nimin chawhma 11:45 khan Lawng­tlai Covid Care Centre (CCC)-a Co­vid-19 vei vanga enkawl mek mi pali zinga hmei­chhe pakhat chu a dam tawh avangin chhuahtir a ni a, amah hi July 28, 2020-a hripui vei tawh lo tih finfiah a ni tawh. Lawngtlai district-ah hian Lawngtlai district Covid-19 vei mi 23 hmuh a ni tawh a, chu'ng zinga 20 chu an chhuak tawh a ni.

Nimin chawhnu lam khan Berawtlang, Aizawl­a CCC aṭangin mi pahnih - NDRF mi leh civil mi pakhat ve ve chhuahtir an ni a, Zokhawsang CCC (Assam Rifles Covid-19 veite awmna) aṭangin AR mi leh sa pakua chhuahtir an ni. Lungleia CCC - SIRD aṭangin BSF mi leh sa pali, mipa vek chhuahtir an ni bawk.

Nimina Covid-19 vei dam tawh chhuahtirte hi mipa 15 leh hmeichhia pakhat an ni a; Assam Rifles mi pakua, BSF mi pali, NDRF mi pakhat leh civil mi pahnih an ni. Mizorama Covid-19 vei hmuh chhuah tawh zawng zawng chu mi 501 zinga mi 282 chu enkawlna aṭangin hawtir ni an ni tawh a, 219 an la chhuak lo. Hripui kai, endik nawnnaa vei tawh lo (negative tawh) tih finfiah tawh, la chhuahtir si loh eng emaw zat an awm bawk.