Lalsawta'n LMC inthlanpui neih tura Congress party candidate tur a puang
Mizoram Pradesh Congress Committee (MPCC) president Lalsawta chuan March 29, 2023-a Lunglei Municipal Council inthlanpuia an candidate turte nimin khan Lungleia Congress Bhavan-ah a puang a; Lunglei khawpuiin harsatna a neihte chinfel a nih theih nan Congress party candidate vote ṭheuh turin Lunglei mipui a sáwm.
LDCC president KL Chhawnzauva kaihhruaia candidate puanna inkhawmah Lalsawta chuan, an party candidate turte chuan ramin a ko tih an pawm avangin candidate nih an pawm thu sawiin, "He ramin a kohna hi a na em a ni," a ti.
Lalsawta chuan, Congress party-in thuneihna sem zâi ṭha an tih thu sawiin, "He laia tih theih reng Aizawla kal fo a ngai hi thuneihna sem zâi loh vang a ni," a ti a; "Lunglei by-pass road siamna tur Congress sorkarin a dah tawh hmun danga pawhpên a ni hi a lungchhiatthlak," tiin, Lunglei tan tui hnianghnâr zawk ngaihtuah a ngaih thu a sawi.
MPCC President chuan, councillor tura an candidate-te chu civic body ngai pawimawh tura chahin, Lungleiah sorkar hnathawkte hna kawptir tam lutuk avangin Lunglei an khawngaihthlak thu a sawi a; harsatna hrang hrang chinfel a nih theih nan Congress party candidate-te vote turin Lunglei mipui a sáwm a ni.
Candidate puanna inkhawmah hian MPCC vice president Lal Thanzara pawhin thu sawiin, "Sum pawh awm mang loin barh luih municipal council in nei dawn a, CM-in campaign paha Lunglei panna kawng siamṭha tura PWD hotute phone hmanga a hrilh kha thil dangdai tak a ni," a ti.
