1st MAP Ground phûl lem leh gallery hawng; Covid-19 kara kan thawh rah a lang - CM; MLA-te pawhin a fala min hmuhin phul lem min dil vek - RRR

9th March, 2023

1st Bn. MAP Parade Ground, Armed Venga phùl lem phah thar leh mipui ṭhutna (gallery) siam thar chu nimin khan chief minister Zoramthanga'n a hawng a; Covid-19 kara an hnathawh rah a lan thu a sawi. Sports minister Robert Romawia Royte chuan MLA dangte pawhin phul lem chu an dil vek thu a sawi bawk.

1st MAP Ground chei ṭhatna atan hian November 25, 2019 khan sorkar laipuia Ministry of Youth Affairs & Sports hnuaia Khelo India aṭangin cheng nuai 500 hmuh a ni a, February 26, 2020-ah Décor India - Complete Sports Solution hnenah work order pek a ni.

Chumi hnuah khelmual thlang lamah a zauhna tur siam hmasak tum a ni a, tender chhuah a nih hnuah Creative Minds, Aizawl chu thawk tura thlan a ni. Hemi atan bik hian SEDP aṭangin cheng nuai 425 leh Khelo India aṭangin nuai 450 hmuh a ni. Mipui ṭhutna siamna leh phùl lem phahna atana sum hmuh zawng zawng chu nuai 1,375 a tling.

CM Zoramthanga chuan, Covid-19 buaina karah sorkarin theihtawp a chhuah tih sawiin, "A rah chu tunah a lo thleng ta. Indopui vanga Japan ramin chhiatna an tâwk leh atom bomb-in an khawpui a tichhe vek chungin an thawhrimna avangin an ding chhuak leh a, harsatna hi dinchhuahna atan hman theih a ni," a ti.

Tun hma chuan field diak leh khu tak takah inkhelh ṭhin a nih thu sawiin Zoramthanga chuan, "Covid vanga harsatna karah Pathian malsawmna ropui, tun hmaa kan neih ngai loh kan nei a ni," a ti a; bawng vun khâwra aurinna siam chawp nen an inkhelh ṭhin laite ngaihtuahin, khelmual síra tawm hulna tur ṭha tak a awm tate chu hmasawnna nasa tak a nih thu a sawi.

Home minister Lalchamliana pawhin thu sawiin, "Mizoram pachhiatzia leh Sport department-in budget tlemtê an nei chunga Sports Minister-in theihtawp chhuaha hmalakna ropui tak a kalpui hi a fakawm," a ti a, khelmual hmangtu turte duhsakna a hlân.

Thusawitu dang SYS minister Robert Romawia Royte chuan, phùl lem a tam tia sawi ṭhin a nih thu sawiin, "A tak takah chuan mamawhna vanga siam a ni. Area hrang hrangah an duh ber chu phùl lem a ni. MLA-te pawhin a fála min hmuh chuan phùl lem min dil vek. Tun sorkarah hian Mizoram sorkar hmalaknain phùl lem 30 siam hman kan tum," a ti.

Khelmual hawnna inkhawmah hian Mizoram Football Association senior vice president PC Vanlalhruaia leh IGP John Neihlaia-te pawhin thu an sawi a ni.