Thlâktu awm loa doctor sawn duh lo

Vairengte Joint VC kaihhruaia Vairengte pawl hrang hrangte nimina ṭhukhawm chuan, Vairengte damdawi-in (community health centre)-a thawk mek doctor chu thlâktu awm loa sawn chhuah an duh loh thu an tarlang a; Vairengte a chhuahsan an phal lo.

Vairengte VC leh NGO-te chuan, Lengpui doctor Suangpuilawna insawn tura thupek awm sa sût a nih avangin an khuaa doctor pakhat chu thlaktu awm loin Suangpuilawnah sawn a nih thu an tarlang a, "Hriatthiam har kan ti a, a thlaktu tur hi sorkar hian a rang thei ang bera dah ngei turin kan ngen. Vairengte doctor hi a thlaktu an awm hma chuan Vairengte a chhuahsan kan remti dawn lo," an ti.

Vairengte chu ramri depa awm a nih avangin an damdawi-in chu Vairengte bakah a chhehvel khaw hrang hrang mipuiin an pan khawm ber a nih thu tarlangin Vairengte VC leh NGO chuan, ramri hnaiha Mizoram police duty-te pawhin an pan ber, chetsualna leh hman-hmawhthlak bikah pawh pan ber ṭhin a nih thu an tarlang bawk.