END leh Police-in heroin an man; 2023-ah heroin kg.6.182 man tawh

Excise & Narcotics department (END) leh Mizoram Police-te chuan tun hnai khan heroin tam tham tak an man. END chuan kumin chhungin heroin kg. 6 leh gram 182 an man tawh.

Mizoram Police-a Special Narcotics mite chuan March 7, Thawhlehni khan Lalchhanchhuaha (23) s/o Vanlalchama, Champhai Bethel Veng nia inchhál hnen aṭangin Lalnghakliana Filling Station, Ngaizelah heroin gram 18.08 an man.

Champhai khawpui dái, Khankawn checkgate-a duty-te pawhin March 6, 2023 zan khan car pakhat, registration number nei lo aṭangin heroin kg. 2.853 (hawng 249) an man bawk a, cheng vbc. 14 chuang man a ni.

Lirthei an endik laiin car khalhtu leh mi dang pakhatte chu thimthamah ramhnuai lamah an tlânchhia a, pakhat zawk Farook Hosen (37) s/o Abdul Hashem, Bhola Mura, Tripura chu March 7 khan man a ni a, pakhat dang an zawng zui zel bawk.

END chuan tun hnai khan Serchhip district-ah heroin gram 338.450 (hawng 27) an man. March 6 khan Serchhip Chhimvengah heroin gram 11.930 leh a neitu nia puh Lalruathlua (24) s/o Zohmangaiha, Serchhip Field Veng nia inchhál an man a; Serchhip Kikawnah heroin gram 270.070 leh a neitua puh Lalnunhlima (32) s/o Hrangthankima, New Serchhip nia inchhal an man.

END hian March 4 zan dar 6:30 khan Sailiam, Serchhip leh Mat leiah heroin gram 56.450 leh a neitua puh mi pali - Lalzarmawii (28) d/o Lalhmingliana (L), Thenzawl Bazar Veng, Lalrinawma (39) s/o Lalchungnunga, Khawbung, David Lalremruata (30) s/o Zothanga, Zokhawthar leh Lalzuimawia (24) s/o Liankhuma (L), Zokhawthar nia inchhalte an man bawk.

END hian kumin 2023 chhungin heroin kg. 6 leh gram 182 an man tawh a, Aizawl district bikah kg. 4 leh gram 82 an man tawh a ni.