Lungsena vawk thi; ASF vang nia hriat a ni

Kum 2021-a Mizorama African Swine Fever (ASF) len ṭanna leh vawk tam tak thihna Lungsen, Lunglei district-ah vawk thi an awm leh zauh zauh a, ASF vanga thi nia rin a ni.

Lungsen aṭanga Vanglaini thu dawn danin, Lungsenah hian kum 2021-a ASF vanga vawk tam tak an chàn hnuah bul ṭan thar lehin chhungkaw eng emaw zatin vawk an vulh leh tawh a; tun hnaiah vawk thi a awm leh tâk avangin vawk vulhtute an mangang ru tawh hle.

Lunglei leh Tlabunga AH&Vety department-a thawktute chu Lungsenah an kal tawh a, finfiahna awm chiah lo mahse vawk thite chu ASF vanga thi ni ngeiah an ngai.

Tlabunga vety officer Dr K Lalhlimpuia sawi danin, kum 2021-a ASF lèn laia vawkte chu suat vek a nih loh avang leh vawk-in tihthianghlim ṭhat tâwk loh awm palh thei a nih avangin ASF a la chám nia rin a ni.

Lungsen aṭanga thu dawnna chuan, kum 2021-a ASF vanga vawk tam tak a thih ṭum khan vawk neitute chuan zangna-dawmna an dawng lo a, chuvang chuan tuna an vawk vulhte chu an chàn leh an hlau zual a ni.