Inpumkhat leh inlungrual takin mipui rawngbawl hna kan thawk - Tawnluia

MNF senior vice president Tawnluia chuan nimin khan Khawzawlah an party pisa Mizo Hnam Run a hawng a, inpumkhat leh inlungrual takin mipui rawngbawl hna an thawk niin a sawi.

Tawnluia chuan, MNF party chuan Zoramthanga kaihhruaina hnuaiah inpumkhat leh inlungrual takin Zoram mipui rawng an báwl nia sawiin, "Kan inpumkhatna ṭha tak hi ṭhenkhatte'n tihchhiat tumin, kan pu ber chu hmuhmawhna leh sawichhiatna chi hrang hrang nen bei ṭhin mah se, thu dik a lo lang a, a beitute'n an mawng an hlîm leh ṭhin," a ti.

November thlaah MLA inthlanpui neih a ni dawn nia sawiin Tawnluia chuan, "Kan sorkar, kan CM leh kan minister-te mualpho leh chan chhe khawp emaw, hmingchhiatna khawpa do theihna tur engmah a awm lo hi a lawmawm," a ti a; budget session neih zawh tâk chu an party tan hlâwknaa an ngaih thu a sawi.

MNF Senior Vice President chuan, Lunglei Municipal Council inthlan turah an chak ngei an rin thu leh an phûr thu a sawi a, "Chakma ADC inthlan neih tur atan leh kumin November thlaa MLA inthlanpui neih tur atan pawh kan inbuatsaih mek a ni," a ti.

Khawzawla Mizo Hnam Run hi ft. 29x7-a zau, chhawng hnih a ni a, a sakna atan cheng nuai 42.59 hman a ni.