International Women's Day hman a ni

Nimin March 8 kha International Women's Day (Hmeichhiate Ní) a ni a, thupui chu 'Embrace equity' tih niin, Mizoram hmun hrang hrangah hman a ni. Aizawlah chuan Hotel Regency leh Police Headquarters multipurpose hall-ah hman a ni a, minister Lalruatkima leh Lalrin­awma ten an hmanpui.

International Wo­men's Day hi chawlh­kar khat chhung hmang tura Ministry of Women & Child Development-in a tih angin Social Welfare & Tribal Affairs department leh Directorate of Women & Child Development chuan March 1 aṭang khan an hmang ṭan a, nimin khan a hmanna pui ber leh a khârna inkhawm PHQ Multipupose Hall-ah an buatsaih a, SWTA minister Lalrinawma'n a hmanpui.

SWTA department bultuma Women's Day hmannaah hian India rama civil mite chawi­mawina sang Padma Shree dawng tura thlan KC Runremsangi leh Veronica Zatluangi hnen­ah chawimawina hlan a ni.

International Wo­men's Day pual hian AIKO chuan Hotel Re­gen­cy-ah Mizo hmei­chhe chhuanawmte chawimawina hun an buat­saih a, minister Lalruat­kima'n hman­puiin, pawl hrang hrang aiawh an tel. B Sang­khumi, Lalriliani, Marli Vankung leh Lalhmingliani te hnenah chawimawina hlàn a ni.

Hotel Regency-a Women's Day hmannaah Lalruatkima chuan, tunlaiin mipate'n hmeichhiate tluk lohna tam tak an nei tih sawiin, "Hmeichhiate hian fak an phú a, inchhungkhura chêt zawng zawng an kut a ni a, khawsak rêl nen, naupang buaipui nen, heti khawpa hma an sawn thei hi a lawmawm a, mipate'n inzirna tur tam tak kan nei," a ti.

Hmeichhiate'n politics lamah ṭan an lâk ṭul a tih thu sawiin Minister chuan, inthlannaah hmeichhe tana seat hauha candidate turah an buai ṭhin thu a sawi a, "A ti àwmte kan lên chilh a, an lo pha zel. Women empowerment kan ti a, reserve seat kan inpe a, a manganthlak. Lungleiah pawh kan party chuan kan la final thei lo, kan final theih lohna kha hmeichhe ward zel a ni a, party dang pawh an ni ve tho. Hmeichhe tana seat hauhte chuh tura infuih a pawimawh," a ti a; Mizote inthlah punna turin fa neih tam a ṭul thu a sawi bawk.

PHQ Multipupose Hall-a Women's Day hmannaah SWTA Minister chuan, hmeichhiate pawimawhzia inzirtir fo a pawimawh thu sawiin, "Mizoramah hmeichhiate dinhmun ṭha chho zelin, mi tam tak chàwi kàn ni tawh mahse ṭan lak a la ngai nasa. Hmeichhiate cháwi kâng leh dâwm kâng turin hmeichhiate kutah a innghat thui hle," a ti.

Lalrinawma chuan, chhung-kua leh khawtlangah hmeichhe zahna inzirtirna tam a ṭul thu sawiin, "Mi ṭhenkhat, an zalenna dár rîk hnu pawha tlàn chhuah nachang hre lo, Pathian remruat emaw ti tlatte zirtira chawi kâng zel tura ṭan lâk a pawimawh," a ti a; chhungkua leh fanauteah bul ṭan a ṭul thu a sawi.