Champhai NGO-ten NH-6 siam mekah harsatna siam lo turin mi tin an ngen

Champhaia pawl pali - YMA, MZP, MUP leh MHIP-te chuan, National Highway (NH) no. 6 laih mek chu a hun taka zawh a nih theih nan harsatna siam lo turin mi tin an ngen.

Champhai NGO-te chuan thuchhuah inṭâwm siamin, NH-6 kawngpui laih mek Champhai District Monitoring Team-in an chairman James Lalrinchhana, DC hoa an district chhung bika hnathawh an endiknaah an tel ve thu an tarlang a, "Ngun taka enfiah a nih hnuah kawngpui sial hna thawktute hmalakna ṭha kan ti a, beisei ang takin khawchhak tlangdung mipui mamawh em em kawngpui ṭha kan nei thuai dawn niin a lang," an ti.

Centre for Environment and Social Justice-te'n kawngpui laih mek tikhawtlai thei tura Champhai DC hnena stay order pe tura an ti chu pawi an tih thu tarlangin NGO-te chuan, "Khawchhak tlangdungte'n kawngpui ṭha an neih thuai theihna tura stay order pe lo turin DC kan ngen a ni," an ti a; hnathawktu lamin an sawi anga June 25, 2023 ral hma ngeia siam zawh a nih theih nan harsatna siam lo turin mi tin an ngen.

Champhai NGO-te chuan, NH-6 Package-I thawktu Shri Dhariwal Buildtech Ltd-in lung hman tlaka an ngaih quarry chu sawiselna a awm avangin hnathawh tihtawp lailâwk rih a nih thu an tarlang a, "Hna thawktute hian tuna an lung lâk aia ṭha an hmu lo a nih chuan a hun takah hna an zo hman dawn lo nia hriain, eng emaw chenah mipui pawhin hriatthiamna an neih a ṭul," an ti.