Lalpa Chhiahhlawh Intelkhawm-te'n MLA inthlana candidate tur an puang

Lalpa Chhiahhlawh Intelkhawm tih invuah pawlte chuan March 7, Thawhlehni zan khan Ignite Studio, Khatlaah kumin 2023 tawp lama MLA inthlanpui awm tura an candidate tur mi panga an puang.

Lalpa Chhiahhlawh Intelkhawm tihte hian kum 2023 Mizoram inthlanpuia an candidate turte chu Pathian Lal Ram Sawrkar tana thuthlung báwm zâwntu tur tiin an tarlang a; he pawlah hian Zoram Thar hruaitu Rev. Dr Zaichhawna Hlawndo chu a bul tumtu nia thu dawn a ni.

Zaichhawna Hlawndo chuan, Pathianin a pianna ramah missionary tura kîr tura a tih chhan ber rorelna siamṭhat chu a takin a din ngei a beisei thu leh, Lalpa chhiah-hlawh tura mi inpe ngam an awm chu lawmawm a tih thu a sawi a, "Nehemia hoa Jerusalem kulh chim din ṭhat leh vek a nih angin, kan ram leh hnam tluchhe mek tungdinga siam ṭha turin theihtawp kan chhuah zel dawn a ni," a ti.

MLA inthlanpuia Lalpa Chhiahhlawh Intelkhawm candidate tur dangte chu April 2023 hun remchang hmasaah puan leh tur a nih thu leh, kumin June thla ral hmain mi 40 puan kim hman an beisei thu an tarlang.