Women's Polytechnic campus kawng siamṭhat phûtin zirlaite an pungkhawm

Aizawla Women's Polytechnic Students' Union chuan Durtlanga an campus chhung kawng siam tum sût a nih avangin March 7, Thawhlehni tlai khan PWD-in bungrua leh hmanruate lak chhuah an tum an dang a; sorkar hotute'n kawng siam an tiam zui avangin Thawhlehni tlai vêk khan lungawi lohna lantir an titawp.

Women's Polytechnic SU chuan thuchhuah siamin, "Hun rei tak kan lo buaipui tawh kan institution kawng chu min rawn siamsak hnuin, kan campus chhung estimate-a awm tawh chu min divert sak leh a. Thuneitute nena kan inbiaknaah PWD Secretary-in an rawn siam ngei tur thu min tiam a. Vawiin (March 7) thlenga hmalakna hmuh tur a awm loh avangin thuneitute kan ring zo tawh lo a, thu chiang min pek theih hma chu tiam chin awm loin lungawi lohna kan lantir ang," an ti.

Women's Polytechnic SU General Secretary hnen aṭanga thu dawn danin, Women's Polytechnic zirlaite chu March 7 chawhnu lam khan an campus bulah pungkhawmin, lungawi lohna an lantir a; PWD-in kawng siamna hmanruate lak chhuah an tum pawh an dang a ni.

Lungawi lohna an lantir hnuah PWD hotute'n Women's Polytechnic campus chhung kawng chu March 10, 2023 (Zirtawpni) aṭangin an siam tur thu an hrilh avangin lungawi lohna an lantir chu an titawp a; kawng siamna hmanruate pawh campus chhungah dah luh a ni.

Women's Polytechnic SU chuan, an inbiakremna anga hmalak a nih loh chuan na zawkin nawrhna kalpui an tum thu an tarlang bawk.